vaan to milne ka irada hi nahin
yaan vo khvahish hai ki hota hi nahin
yuun satane ke to laaeq the na ham
aap ne kuchh hamen samjha hi nahin
jis se taskin ho miri ai qasid
aisi to baat tu kahta hi nahin
aur bhi aisi to baten hain bahut
gila-e-ranjish-e-beja hi nahin
le gaiin nichi nigahen dil ko
aankh utha kar abhi dekha hi nahin
rashk-e-dushman se nasihat hui aap
dil vahan jaane ko hota hi nahin
aur jo zulm ho manzur mujhe
ghair se rabt gavara hi nahin
yaan to ye muntazir-e-vaada ham
aur vaan yaad vo vaada hi nahin
rabt-e-dushman se hai inkar abas
hamen is baat ka shikva hi nahin
ham khuda se bhi nahin mangte kuchh
yaan koi apni tamanna hi nahin
na sahi koi burai na sahi
tum se milna mujhe achchha hi nahin
us ki har baat ko sach samjhe ‘nizam’
us sa ayyar to paida hi nahin
Leave a Reply