Aslam Noor Aslam
ḳhudi men Duub ke ḳhud se kabhi mile ho kya
hujum-e-yaran men tanha kabhi hue ho kya
na jaane kis liye duniya ka rona rote ho
mizaj us ke nahin jante na.e ho kya
ḳhatra bhaTakne ka rahta hai jis ravish pe bahut
tum us ravish pe kabhi duur tak ga.e ho kya
vo jis pe mujh ko shikayat nahin rahi tum se
us ek baat pe mujh se ḳhafa hue ho kya
yahi saliqa hai yaron kisi pe marne ka
kabhi kisi ke liye zindagi jiye ho kya
junun-e-ishq ki parvaz men ye kis ka ḳhauf
bulandiyon ke taqazon se Dar ga.e ho kya
Leave a Reply