Hashim Raza Jalalpuri
ḳhudaya bhej de koi dava udasi ki
jahan men phail rahi hai vaba udasi ki
mujhe shadid udasi ka samna hoga
so meri maan ne sikha di dua udasi ki
ik aisi sham-e-sitam aa.i thi sitaron ne
saron pe oḌhi thi kaali rida udasi ki
na-jane kaun sa gham hai miyan-e-dida-o-dil
barasti rahti hai paiham ghaTa udasi ki
namaz-e-ishq musalle pe kab ada hui hai
aza ka farsh ya karb-o-bala udasi ki
miri panah men aao ai dard ke maaro
tamam dahr men gunji sada udasi ki
udasiyon ki inayat hai kar-ha-e-suḳhan
mire liye to jaza hai saza udasi ki
ghamon ki dhuup se saa.e men aa ga.e ‘hashim’
magar kisi ne na puchhi ‘raza’ udasi ki
Leave a Reply