ḳhud se niklun bhi to rasta nahin asan mira
meri sochen hain ghani ḳhauf hai gunjan mira
hai kisi aur samay par guzar-auqat miri
din ḳhasara hai mujhe raat hai nuqsan mira
mera tahzib-o-tamaddun hai ye vahshat meri
mera qissa, miri tariḳh hai nisyan mira
main kisi aur hi aalam ka makin huun pyare
mere jangal ki tarah ghar bhi hai sunsan mira
din nikalte hi mire ḳhvab bikhar jaate hain
roz girta hai isi farsh pe gul-dan mira
mujh ko jis naav men aana tha kahin duub gai
ḳhvab hai niind ke sahil pe pareshan mira
Leave a Reply