Kabhi Jabr-O-Sitam Ke Ru-Ba-Ru Sar KHam Nahin Hota

kabhī jabr-o-sitam ke rū-ba-rū sar ḳham nahīñ hotā

mirā jazb-e-sadāqat ġhair-mustahkam nahīñ hotā

saroñ kī fasl kaTne kā ye mausam to nahīñ lekin

saroñ kī fasl kaTne kā koī mausam nahīñ hotā

jinheñ aatā ho fan auroñ ke ġham apnā.e jaane kā

unheñ tā-zindagī duniyā meñ koī ġham nahīñ hotā

hamāre daur meñ ab nafsā-nafsī kā ye aalam hai

janāze roz uThte haiñ magar mātam nahīñ hotā

zabāñ ke tāziyāne se kaleje par jo lagtā hai

vo aisā zaḳhm hai jis kā koī marham nahīñ hotā

milī aslāf se ‘jāved’ mujh ko sidq kī daulat

sulūk-e-nāravā se bhī ye jazba kam nahīñ hotā

Leave a Comment