Akhgar Mushtaq Raheem Aabadi
ḳhud nazaron pe nazaron ko hansi aati hai
baghbanon pe baharon ko hansi aati hai
ab ye kyuun zikr-e-baharan pe chaman men akasr
phuul to phuul hain ḳharon ko hansi aati hai
mehr-o-iḳhlas ki duniya men ye kya baat hui
aaj yaron hi pe yaron ko hansi aati hai
aisi be-jan si hai mere harifon ki hansi
jaise tufan pe kinaron ko hansi aati hai
kya kare aah vo bechara musafir jis par
aap ki rah-guzaron ko hansi aati hai
koi jab chand sitaron se ho masruf-e-suḳhan
kis qadar chand sitaron ko hansi aati hai
ḳhair ho ḳhair mashiyyat ke iradon ki qasam
aaj taqdir ke maron ko hansi aati hai
haae kis moḌ pe aaya hai ab afsana-e-gham
mere afsana-nigaron ko hansi aati hai
ham hain mahrum-e-masarrat to koi baat nahin
ye bhi kya kam hai saharon ko hansi aati hai
gardish-e-vaqt ne kya phir koi surat badli
ya yunhi vaqt-guzaron ko hansi aati hai
shayad ‘aḳhgar’ hi ki tauba ki ḳhabar hai yaaro
aaj saaqi ke isharon ko hansi aati hai
Leave a Reply