ankhen dikhain ghair ko meri khata ke saath
matlab ada vo karte hain aur kis ada ke saath
shokhi nigah ke saath taghaful jafa ke saath
ushshaq par hujum-e-bala hai bala ke saath
akhir hua na zabt shab-e-vasl muddai
naala nikal gaya miri lab se dua ke saath
tere sitam se mujh ko mila mansab-e-kalim
ik vajh-e-guftagu nikal aai khuda ke saath
tera hijab uthte hi aaya vo na-gahan
dushman ke paaon khul gae band-e-qaba ke saath
men kya ki dushmanon ki bhi qismat ulat gai
tirchhi adaen aur teri banki ada ke saath
rah-e-talab men shauq ki manzur hai numud
mitte qadam qadam pe chale rahnuma ke saath
yarab ghalat ho fahm-e-kaj-andesh ka guman
kuchh kah raha hai in se adu iltija ke saath
dete nahin kisi ko pata apne haal ka
begana ban ke chalte hain har ashna ke saath
mai be-talab mili to hui yaar ki talab
bandon ke naaz bhi hain nirale khuda ke saath
josh-e-qalaq men dekhiye kya mangta huun main
yaron ke dam nikalte hain meri dua ke saath
ghar se mujhe nikalte rahiye par is tarah
gah muddai ke saath gahe muddaa ke saath
kyuun shauq men giraiye saath apne shan-e-ishq
aghmaz bhi zarur hai kuchh iltija ke saath
kahta huun ye nasib na dushman ko ho firaq
aa main vo kahte jaate hain meri dua ke saath
laila ka naam zinda hai ab tak jahan men
tum bhi nibah do kisi ahl-e-vafa ke saath
phirte hi us ki aankh ke vabasta-tar hava
main dil ke saath dil nigah-e-fitna-za ke saath
ham alam-e-khayal men kuchh bhi na khush hue
hai rashk-e-ghair yad-e-lab-e-jan-faza ke saath
ab to bada khayal teri ranjishon ka hai
mahshar men dekh lenge khuda ki khuda ke saath
kahta hai dar ke haath vafa se utha liya
dushman ki baat ban gai meri dua ke saath
aata hai bu-e-dost men kafir basa hua
qasid bhi ik raqib hai apna saba ke saath
kya dhundhte ho dahr men ‘anvar’ jamal-e-dost
chande phiro chalo kisi mard-e-khuda ke saath
Leave a Reply