ḳhud men jhanka to ajab manzar nazar aaya mujhe
apne andar bhi aja.ib ghar nazar aaya mujhe
mujh se us ka ham-safar banna bhi kab dekha gaya
vo bhi apni raah ka patthar nazar aaya mujhe
hadson ne us ke paanv se bhi dharti khinch li
vo bhi sail-e-vaqt ki zad par nazar aaya mujhe
mehrban koi sharik-e-qaid-e-tanha.i na tha
apne zaanu par hi apna sar nazar aaya mujhe
dil se thi ummid ḳhvahish ke safar par saath de
par ye shahin bhi shikasta-par nazar aaya mujhe
ek ik lamhe ne sau sau sho.abde dikhla.e hain
sach to ye hai vaqt jadugar nazar aaya mujhe
itni himmat bhi na thi baḌh kar bula leta ‘riyaz’
yuun to vo bazar men akasr nazar aaya mujhe
Leave a Reply