Sohail Akhtar
ḳhizan ki azma.ish ho gaya huun
main ik jangal ki chahat men hara huun
miri kashti kabhi gharqab ki thi
abhi tak main samundar se ḳhafa huun
parinde ho ga.e naraz mujh se
kaha jab main bhi uḌna chahta huun
koi vahshat se bhi milva.e mujh ko
main sahra men abhi bilkul naya huun
abhi ik raushni aa.i thi milne
sabab kya hai ki main bujhne laga huun
yahan ke peḌ saare dam-ba-ḳhud hain
ghazab hai main hi kaaTa ja raha huun
koi paani men kab tak rah sakega
main ashkon se to ankhon tak bhara huun
Leave a Reply