Tujh Ishq Ke Mariz Ki Tadbir Shart Hai

tujh ishq ke mariz ki tadbir shart hai

lekin shifa ko gardish-e-taqdir shart hai

saudai dil ko zulf-e-girah-gir shart hai

divane ke ilaaj men zanjir shart hai

naale to men bahut kiye us but ke samne

patthar ke narm karne ko tasir shart hai

ho khaak rah-e-ishq men ta-qadr ho tiri

mis ke tila banane ko iksir shart hai

kaafi hai ik ishara-e-abru tira hamen

kuchh ashiqon ke qatl ko shamshir shart hai

dil ki shikast-o-rekht ki mere to le khabar

har ghar ki der-pai ko taamir shart hai

karta hai kis gunah pe uqubat hamen tu yaar

taazir ke to vaste taqsir shart hai

‘sauda’ main is chaman men huun juun ghuncha dil-giraft

matam-sara men surat-e-dil-gir shart hai