khinchi hai tasavvur men tasvir-e-ham-aghoshi
ab hosh na aane de mujh ko miri be-hoshi
pa jaana hai kho jaana kho jaana hai pa jaana
be-hoshi hai hushyari hushyari hai be-hoshi
main saz-e-haqiqat huun dam-saz-e-haqiqat huun
khamoshi hai goyai goyai hai khamoshi
asrar-e-mohabbat ka iz.har hai na-mumkin
tuuta hai na tutega qufl-e-dar-e-khamoshi
har dil men tajalli hai un ke rukh-e-raushan ki
khurshid se hasil hai zarron ko ham-aghoshi
jo sunta huun sunta huun main apni khamoshi se
jo kahti hai kahti hai mujh se miri khamoshi
ye husn-faroshi ki dukan hai ya chilman
nazzara ka nazzara ruposhi ki ruposhi
yaan khaak ka zarra bhi laghzish se nahin khali
mai-khana-e-duniya hai ya alam-e-be-hoshi
haan haan mire isyan ka parda nahin khulne ka
haan haan tiri rahmat ka hai kaam khata-poshi
is parde men poshida laila-e-do-alam hai
be-vaj.h nahin ‘bedam’ kaabe ki siyah-poshi
Leave a Reply