Rashid Anwar Rashid
ḳhilaf saari lakiren thiin haath malte kya
jami thi chehre pe gard aa.ina badalte kya
hava.en raah men Dera jama.e baiThi thiin
charagh-e-dil ko liye do-qadam bhi chalte kya
yugon se jism ke andar alaav raushan hai
kisi ki aanch se mere havas jalte kya
chali vo andhi ki jangal bhi kaanp kaanp uTha
ki ham to shaḳh se TuuTe the phir sambhalte kya
paḌi kiran to nadi ban ga.i pahaḌ ki barf
vo Thahre sang zara der men pighalte kya
nadi ke donon kinare hain as-pas magar
janam ke fasle the qurbaton men Dhalte kya
Leave a Reply