ḳhayal-o-ḳhvab ka saara dhuan utar chuka hai
yaqin ke taaq men suraj koi Thahar chuka hai
mujhe uTha ke samundar men phenkne vaalo
ye dekho ek jazira yahan ubhar chuka hai
main ek naqsh, jo ab tak na ho saka puura
vo ek rang, jo tasvir-e-jan men bhar chuka hai
ye koi aur hi hai mujh men jo jhalakta hai
tumhen talash hai jis ki vo kab ka mar chuka hai
tire javab ki ummid jaan se bandhe hue
mira saval hava men kahin bikhar chuka hai
na tar-tar hai daman, na hai gareban chaak
ajiib shakl junun iḳhtiyar kar chuka hai
musafiron se kaho apni pyaas bandh rakhen
safar ki ruuh men sahra koi utar chuka hai
vo jab ki tujh se umiden thiin meri duniya ko
vo vaqt biit chuka hai vo gham guzar chuka hai
‘nabil’ aisa karo tum bhi bhuul jaao use
vo shaḳhs apni har ik baat se mukar chuka hai
Leave a Reply