hashr men aur hi asar nazar aate hain
mere haami shah-e-abrar nazar aate hain
dil-e-betab ko ye kah ke sambhala shab-e-gham
Thahar ab sub.h ke asar nazar aate hain
qalb-e-momin ki ajab shaan hai allah allah
sar jhukata huun to anvar nazar aate hain
shab-e-asra na raha ek bhi parda haa.il
saaf haq ke unhen didar nazar aate hain
dast-e-qudrat ne bana.i hai vo surat teri
jis ke kaunain ḳharidar nazar aate hain
chhup nahin sakte hain us parda nashin ke ashiq
ham ne dekhe hain sar-e-dar nazar aate hain
shafe-e-hashr shafa.at pe kamar-basta hai
aaj har samt gunahgar nazar aate hain
faiz-e-saqi se hai mai-ḳhana-e-hasti abad
aaj mai-ḳhvar hi mai-ḳhvar nazar aate hain
apne batin ko na dekha kabhi zahid tu ne
ham to mai-ḳhvar hain mai-ḳhvar nazar aate hain
abr aate hain jo furqat men tiri ai saaqi
surat-e-dida-e-ḳhunbar nazar aate hain
ghuncha-e-dil jo tire hijr men afsurda hai
baagh men phuul mujhe ḳhaar nazar aate hain
maraz-e-ishq ki halat koi ham se puchhe
vo to achchhe hain jo bimar nazar aate hain
haath ḳhali hai magar dil to ghani hai apna
chashm-e-maḳhluq men zardar nazar aate hain
chhuT ja.enge musibat se ab insha-allah
hijr men maut ke asar nazar aate hain
Dagmagate hain qadam rah-e-vafa men mere
marhale ishq ke dushvar nazar aate hain
is qadar mahv rahe hirs-o-hava men ‘rasiḳh’
ab to surat se gunahgar nazar aate hain
Leave a Reply