Khayal-O-Khwab Hui Hain Mohabbaten Kaisi

khayal-o-khvab hui hain mohabbaten kaisi

lahu men naach rahi hain ye vahshaten kaisi

na shab ko chand hi achchha na din ko mehr achchha

ye ham pe biit rahi hain qayamaten kaisi

vo saath tha to khuda bhi tha mehrban kya kya

bichhad gaya to hui hain adavaten kaisi

azaab jin ka tabassum savab jin ki nigah

khinchi hui hain pas-e-jan ye suraten kaisi

hava ke dosh pe rakkhe hue charagh hain ham

jo bujh gae to hava se shikayaten kaisi

jo be-khabar koi guzra to ye sada de di

main sang-e-rah huun mujh par inayaten kaisi

nahin ki husn hi nairangiyon men taaq nahin

junun bhi khel raha hai siyasaten kaisi

na sahban-e-junun hain na ahl-e-kashf-o-kamal

hamare ahd men aaiin kasafaten kaisi

jo abr hai vahi ab sang-o-khisht laata hai

faza ye ho to dilon men nazakaten kaisi

ye daur-e-be-hunaran hai bacha rakho khud ko

yahan sadaqaten kaisi karamaten kaisi

Leave a Comment