Nooh Narvi
ḳhayal men ik na ik maze ki na.i kahani hai aur ham hain
abhi tamanna hai aur dil hai abhi javani hai aur ham hain
ghariq-e-bahr-e-sitam na kyuun hon ye jan-fishani hai aur ham hain
ki aap hain aap ki chhuri hai chhuri ka paani hai aur ham hain
dam-e-aḳhir us ko ab na sochen ye sochna chahiye tha pahle
ma.aal kya hoga zindagi ka jahan-e-fani hai aur ham hain
ye ishq par husn ki inayat ye husn se ishq ki iradat
hamari hasrat hai aur tu hai tiri javani hai aur ham hain
nigah-e-ulfat bhi ho chali kuchh sitam bhi karne laga vo zalim
agar yahi mehrbaniyan hain to kamrani hai aur ham hain
ada ne chheḌa nazar ne taaka sitam ne luuTa ghazab ne maara
zaban jab se khuli hamari yahi kahani hai aur ham hain
baqa ka charcha jahan bhar men magar baqa se jahan ḳhali
ḳhayal-e-aish-e-mudam kaisa jahan-e-fani hai aur ham hain
abhi se tauba abhi se taqva abhi se kya fikr-e-din-o-uqba
na.i umangen na.i tarangen na.i javani hai aur ham hain
pahunch pahunch kar falak par aahen karen na anjum men kyuun izafa
ki shaam se sub.h tak shab-e-gham sharar-fishani hai aur ham hain
kise tavaqqo na a.enge vo yaqin kise tha bula.enge vo
ye ḳhaas un ki hai mehrbani ki mehrbani hai aur ham hain
uTha hi denge naqab apni dikha hi denge vo apna jalva
nibhegi kab tak ye lan-tarani ye lan-tarani hai aur ham hain
bhare hue chashm-e-tar men aansu jigar men bhaḌki hui tap-e-gham
ye aag hai aur ye hai paani ye aag paani hai aur ham hain
fughan to aḳhir fughan hi Thahri gila to aḳhir gila hi Thahra
muhal hai jis men saans leni vo na-tavani hai aur ham hain
na.e shagufe na kyuun khila.en jo ghuncha-o-gul ko dekh paa.en
bahar to hai chaman ki raani chaman ki raani hai aur ham hain
kabhi to ham hain yahan vahan ke kabhi tasavvur idhar udhar ka
sukun-o-rahat se kya ta.alluq ki bad-gumani hai aur ham hain
jata chuke dard-e-dil ko apne jo ab jata.en to kya jata.en
kahi hui bhi suni hui bhi vahi kahani hai aur ham hain
bahut se ulfat men aa.e tufan raha kiye ‘nuh’ bhi pareshan
magar vahi paiham ansuon ki abhi ravani hai aur ham hain
Leave a Reply