Poet
ḳhat zamin par na ai fusun-gar kaaT
dard-e-sar kaTna hai to sar kaaT
gar likhun us ko nama-e-ulfat
harf-e-matlab ko de muqaddar kaaT
qatl se mere gar phire qatil
daant se luun zaban-e-ḳhanjar kaaT
gar hai bedad hi pasand tujhe
gardan-e-ghair ai sitam-gar kaaT
gham-e-barq-o-tagarg ko na ḳharid
kisht-e-ummid ko sarasar kaaT
vaqt-e-dai zer-e-ḳhar-zar guzar
mausam-e-gul tah-e-gul-e-tar kaaT
pa-e-mardi se dast-burd na chhoḌ
jeb-e-shah-o-gada barabar kaaT
quvvat-e-hazm hai ba-qadr-e-zarf
kya kare mauj-e-ab-e-gauhar kaaT
sabr-o-taslim hi ke andar rah
umr ranj-o-ḳhushi se bahar kaaT
tegh-e-burran-e-vaqt se har dam
rishta-e-arzu ko yak-sar kaaT
mat bana ghar chaman ke andar kaaT
mat laga dil gul-o-sanobar kaaT
ashiyan ke liye chaman ka se
murgh-e-hirs-o-hava ka har par kaaT
qadar-e-aram kuchh to kar ma.alum
roz dushvar raat dubhar kaaT
shart kuchh tegh bandhna hi nahin
ziist ko aa.e jo mayassar kaaT
ai ‘qalaq’ ranj ho ki ho aram
kaaT jaise kaTe subuk-tar kaaT
Leave a Reply