Ada Jafarey
khamushi se hui fughan se hui
ibtida ranj ki kahan se hui
koi taair idhar nahin aata
kaisi taqsir is makan se hui
mausamon par yaqin kyuun chhoda
bad-gumani to saeban se hui
be-nihayat samundaron ka safar
guftugu sirf badban se hui
ye jo uljhi hui kahani hai
mo’tabar harf-e-raegan se hui
dil ki abadiyon ko puchho ho
raushni barq-e-be-aman se hui
tishnagi bebasi lab-e-dariya
meri pahchan hi vahan se hui
itni ujli na thi ye rahguzar
naqsh-e-pa-e-bala-kashan se hui
Leave a Reply