ḳhushk lamhat ke dariya men baha de mujh ko
marg-e-ehsas ki suuli pe chaḌha de mujh ko
kaun aa kar tire insaf ka misdaq bane
be-gunahi pe agar tu na saza de mujh ko
ek pal men ye mira rang uḌa dete hain
raas aate nahin ḳhush-rang libade mujh ko
yuun mujhe dekh ke chehra na chhupa hathon se
main tira jism-e-barahna huun qaba de mujh ko
na mili kucha-o-bazar men DhunDe se kahin
jo nazar naqsh-ba-divar bana de mujh ko
tu hayula jo nahin hai to mire samne aa
gumbad-e-dard men chhup kar na sada de mujh ko
Leave a Reply