main apne jism men kuchh is tarah se bikhra huun
ki ye bhi kah nahin sakta main kaun huun kya huun
unhen khushi hai isi baat se ki zinda huun
main un ki daaen hatheli ki ek rekha huun
main pi gaya huun kai anso.on ke sail-e-ravan
main apne dil ko samundar banae baitha huun
vo mere dost jo ek ek karke duur hue
main un ko aaj bhi apne qarib paata huun
muhit karne ki koshish fuzul hai mujh ko
nadi ka chhor nahin huun main bahta dariya huun
mujhi pe phenke hai patthar jo koi aata hai
ki jaise main tiri khidki ka koi shisha huun
Leave a Reply