umr-e-rafta main tire haath bhi kya aaya huun
din bitane the magar khud ko bita aaya huun
dhuul bhi aise qarine se udaai hai ki main
ek marte hue raste ko bacha aaya huun
kal ko de aunga ja kar use binai bhi
aankh divar pe filhal bana aaya huun
vadi-e-saut nahin mujh ko bhulane vaali
naqsh yuun kar ke vahan apni sada aaya huun
sirf paanv hi nahin qaid se bahar aae
apni zanjir ko bhi kar ke riha aaya huun
apne aansu bhi kiye nazr kisi paani ke
pyaas dariya ki bahar-taur bujha aaya huun
zindagi tu bhi bahut yaad karegi mujh ko
tere hisse ke bhi dukh-dard utha aaya huun
ab pareshan huun ki tabir ka jaane kya ho
band kanon ko naya khvab suna aaya huun
jaane kis ghaat lage umr ki kashti ‘ahmad’
khud ko sukhe hue dariya men baha aaya huun
Leave a Reply