ḳhafi raha ya jali alam-e-shuhud men tha
main amr-e-kun se bhi pahle kisi vajud men tha
kisi sada ne barangeḳhta kiya mujh ko
vagarna main bhi isi halqa-e-ḳhumud men tha
mujhe shu.ur diya be.asat-e-payambar ne
phir is ke baad main allah ke junud men tha
mujhe husain ne zarre se mahtab kiya
main be-nishan tamasha-e-hast-o-bud men tha
na jidd-o-jahd-e-musalsal ne soz-o-saz-e-hayat
misal-e-shajr zamin-bos main jumud men tha
andheri raat men nudrat mili sitare ko
tamam roz vo Duuba hua kabud men tha
talash-e-manzil-e-hasti men ḳhak-bazi ki
mira maqam magar qil.a-e-umud men tha
mujhe qayam ke qabil kiya irade ne
main ek umr talak halat-e-qu.ud men tha
vo karr-o-far-e-taḳhayyul ke nashiran to the
magar har ek numa.ish men ya numud men tha
main madd-o-jazr-e-taḳhayyul ko us ke naam karun
ki jis ka zikr hamesha mire darud men tha
vo taḳht-e-ḳhak pe baiTha vahi qalandar hai
ki jis ke samne jibril bhi sujud men tha
mata-e-qafila-e-ishq jab luTi ‘naqqash’
vo mere mulk-e-sitam-kesh ki hudud men tha
Leave a Reply