ḳhafa ham se vo be-sabab ho gaya
ghazab ho gaya hai ghazab ho gaya
tasavvur men zulf-o-ruḳh-e-yar ke
mira roz manind-e-shab ho gaya
main aage to divana itna na tha
ḳhuda jaane kya mujh ko ab ho gaya
lab-e-nazuk us ke jo yaad aa ga.e
ka.i baar main jan-ba-lab ho gaya
tire gham men sauda-o-ḳhabt-o-junun
jo tha mujh ko manzur sab ho gaya
ye a.ina-ru dekhe yaan ‘muntazir’
ki dil apna rashk-e-halab ho gaya
Leave a Reply