Shahzad Ahmad
kaun kahta hai ki dariya men ravani kam hai
main jahan Duub raha huun vahan paani kam hai
bhuul kar bhi koi sunta nahin rudad miri
vaqi.a is men ziyada hai kahani kam hai
ai ḳhuda phir mire jazbon ko faravani de
zindagi-bhar ke liye ek javani kam hai
mere lahje se mire dard ka andaza kar
meri baton men agar talḳh-bayani kam hai
ye mohabbat hai ki ehsas hai mahrumi ka
meri ankhon men bahut kuchh hai zabani kam hai
Leave a Reply