Bala Ki dhup Thi Main Jal Raha Tha

bala ki dhuup thi main jal raha tha

badan us ka tha aur saaya mira tha

ḳharabe men tha ik aisa ḳharaba

jahan main sab se chhup ke baiThta tha

bahut nazdik the tasvir men ham

magar vo fasla jo dikh raha tha

jahazi qafila duuba tha pahle

samundar ba.ad men uupar uTha tha

zamin-o-asman sakit paḌe the

mire kamre ka pankha chal raha tha

use bhi ishq ki aadat nahin thi

mira bhi pahla pahla tajraba tha

mujhe jab tak talasha raushni ne

main puura tirgi ka ho chuka tha

Leave a Comment