zindagi kaT ga.i sarabon men
ḳhud ko DhunDa kiye kitabon men
zindagi dekh le nazar bhar ke
ham hain shamil tire ḳharabon men
har nasha tha lahu ki garmi se
ab vo masti kahan sharabon men
muḳhtasar ye ki kaT gaya rasta
kuchh gunahon men kuchh savabon men
dard ki dastan adhuri hai
ham ko rakh lijiye hisabon men
kyuun samundar men shor hai barpa
kaun rahta hai in hababon men
dil ke taron se dard uThta hai
soz hota nahin rubabon men
Leave a Reply