Kashti Rawan-Dawan Thi Samundar Khula Hua

kashtī ravāñ-davāñ thī samundar khulā huā

āñkhoñ meñ bas gayā hai vo manzar khulā huā

bistar thā ek jism the do ḳhvāhisheñ hazār

donoñ ke darmiyān thā ḳhanjar khulā huā

uljhā hī jā rahā huuñ maiñ galiyoñ ke jaal meñ

kab se hai intizār meñ ik ghar khulā huā

ik harf-e-mudda.ā thā so vo bhī dabī zabān

ilzām de rahā hai sitamgar khulā huā

sahrā-navard shahr kī saḌkoñ par aa ga.e

chehre pe gard ābla-pā sar khulā huā

Leave a Comment