Karte Hue Tawaf-E-KHayalat-E-Yar Main

Tarkash Pradeep

karte hue tavaf-e-ḳhayalat-e-yar main

phir aa gaya huun zabt ki duniya ke paar main

duniya ko dikh rahi hai to zinda-dili miri

patthar pe sar paTakta hua abshar main

chalakiyan dhari ki dhari rah ga.iin miri

ḳhuub us ke aage ho raha tha hoshiyar main

yuun to zara si baat hai par baat hai baḌi

tu mera gham-gusar tira gham-gusar main

kal tha jo aaj bhi vahi ‘tarkash-pardip’ huun

dilli men aa ke bhi nahin badla ganvar main