karte hue tavāf-e-ḳhayālāt-e-yār maiñ
phir aa gayā huuñ zabt kī duniyā ke paar maiñ
duniyā ko dikh rahī hai to zinda-dilī mirī
patthar pe sar paTaktā huā ābshār maiñ
chālākiyāñ dharī kī dharī rah ga.iiñ mirī
ḳhuub us ke aage ho rahā thā hoshiyār maiñ
yuuñ to zarā sī baat hai par baat hai baḌī
tū merā ġham-gusār tirā ġham-gusār maiñ
kal thā jo aaj bhī vahī ‘tarkash-pardīp’ huuñ
dillī meñ aa ke bhī nahīñ badla gañvār maiñ