Karrar Noori
karb hai karb ki avaz barabar hai yahi
teri qimat hai yahi tera muqaddar hai yahi
ji men hai ab kisi darvaze pe dastak de duun
aur phir puchhun ki ai shaḳhs mira ghar hai yahi
kaun samjhega agar main ne kahi bhi rudad
chup hi ho ja.un mire vaste behtar hai yahi
ab to jo zarra bhi daman se lipaT jaata hai
main samajhta huun mira mehr-e-munavvar hai yahi
chandni-rat men ḳhud apne hi saa.e se milun
mera munis hai yahi ab mira rahbar hai yahi
ab to har lahza har ik moḌ pe hota hai guman
jis ke baare men suna ham ne vo mahshar hai yahi
sher kahne ko to ham ne bhi kahe hain ‘nuri’
ye jo ḳhamosh sa baiTha hai suḳhnavar hai yahi
Leave a Reply