kar ke ḳhvab aankh men pahle to vo laa.e ḳhud ko
aur phir mujh ko jagane ko sata.e ḳhud ko
hai ye lazim ki mala.ek bhi bashar ho jaa.en
ab jo insan farishta nazar aa.e ḳhud ko
aḳhri marhala aaya hai mohabbat ka ab
ab diya ḳhud hi bujha kar bhi dikha.e ḳhud ko
vo pazira.i kahin ishq men milti hi nahin
jo bhi ruTha hai vo ab ḳhud hi mana.e ḳhud ko
mujh men tu tujh men talashun huun main sirat apni
sang is tarz pe a.ina bula.e ḳhud ko
vaqt-e-duniya ko samajhne men karen zaaya kya
haif ab tak to na ham hi samajh aa.e ḳhud ko
rahzan-e-asr hi le jaa.e na aage ki raah
kah do ‘atif’ se ki tezi se baḌha.e ḳhud ko
Leave a Reply