parde parde men bahut mujh pe tire vaar chale
saaf ab halq pe khanjar chale talvar chale
duri-e-manzil-e-maqsad koi ham se puchhe
baithe sau baar ham us raah men sau baar chale
kaun pamal hua us ki bala dekhti hai
dekhta apni hi jo shokhi-e-raftar chale
be-piye chalta hai yuun jhuum ke vo mast-e-shabab
jis tarah pi ke koi rind-e-qadah-khvar chale
chashm o abru ki ye sazish jigar o dil ko naved
ek ka tiir chale ek ki talvar chale
kuchh is andaz se sayyad ne azad kiya
jo chale chhut ke qafas se vo giraftar chale
jis ko rahna ho rahe qaidi-e-zindan ho kar
ham to ai ham-nafaso phand ke divar chale
phir ‘mubarak’ vahi ghanghor ghataen aaiin
janib-e-mai-kada phir rind-e-qadah-khvar chale
Leave a Reply