Kar De Karishma Aisa Ubur-E-Kitab De

kar de karishma aisā ubūr-e-kitāb de

denā tū jis ko chāhe use be-hisāb de

sūraj kī aarzū meñ kuchal Daalī kahkashāñ

kis ḳhaak meñ the kitne sitāre hisāb de

rahmat ke saath chāhūñ razā-e-ḳhudā bhī ho

mahshar ke roz baḳhsh na koī itaab de

yuuñ ā.īne se dil ke tū har zang ko miTā

is dil ke aa.ine ko na.ī aab taab de

pahuñchūñ jo maiñ salām malā.ek mujhe kaheñ

baḳhshish ho yuuñ ki sāqī-e-kausar sharāb de

ab ishq kā gunāh to sarzad huā hī hai

chāhe azaab de tū ki chāhe savāb de

ab roz kī tarah tū na yuuñ lait-o-la.al kar

kar dar-guzar gunāh tū musbat javāb de

jalva atā ho hashr ke maidān meñ mujhe

aur mustazād mujh ko tū jalve kī taab de

Leave a Comment