Shakeel Jamali
dilon ke mabain shak ki divar ho rahi hai
to kya juda.i ki raah hamvar ho rahi hai
zara sa mujh ko bhi tajraba kam hai raste ka
zara si teri bhi tez raftar ho rahi hai
udhar se bhi jo chahiye tha nahin mila hai
idhar hamari bhi umr be-kar ho rahi hai
shadid garmi men kaise nikle vo phul-chehra
so apne raste men dhuup divar ho rahi hai
bas ik ta.alluq ne meri ninden uḌa rakhi hain
bas ik shanasa.i jaan ka azar ho rahi hai
yahan se qissa shurua hota hai qatl-o-ḳhun ka
yahan se ye dastan mazedar ho rahi hai
ye log duniya ko kis taraf le ke ja rahe hain
ye log jin ki zaban talvar ho rahi hai
Leave a Reply