kam-ḳhvab the auron ko jagate hue guzre
ham vaqt-e-sahar Dhol bajate hue guzre
ik jada-e-pur-ḳhar thi dushvar thi duniya
ushshaq magar jhumte gaate hue guzre
har naz-e-saba rashk-e-chaman husn-e-mujassam
pathra.e agar aankh milate hue guzre
ik ziist ki vaadi thi magar yaad nahin hai
aate hue guzre the ki jaate hue guzre
pahle kiya taḳhliq use aag se ham ne
phir ham hi use haath lagate hue guzre
sur-tal ko ashkal ko alfaz men Dhala
imkan ko imkan banate hue guzre
vo jan-e-suḳhan gosh-bar-avaz nahin tha
divar ko ash.ar sunate hue guzre
kuchh ḳhugar-e-duniya to kisi ko gham-e-yazdan
darvesh magar haath chhuḌate hue guzre
sharminda-e-vus.at hain zaminen bhi ḳhala bhi
dar dasht-o-daman ḳhaak uḌate hue guzre
munh rakh ke tire munh pe tujhe saans pila.i
ham jaan se tiri jaan bachate hue guzre
ham bhuul bhi jaa.en to hamen DhunD sake tu
raste men tire phuul girate hue guzre
is chashm-e-namak-bar ki viran gali se
barish men lagatar nahate hue guzre
logon ne kiya daur-e-junun gharq-e-ibadat
‘akash’ miyan khelte khate hue guzre
Leave a Reply