Gili lakDi Ko Sulga Kar Ashkon Se Arzi Likhunga

giilī lakḌī ko sulgā kar ashkoñ se arzī likhūñgā

aaj dhueñ ke bādal par maiñ bārish ko chiTThī likhūñgā

is zindāñ ke kuchh qaidī hī merī baat samajh pā.eñge

jab patthar kī dīvāroñ par miTTī se miTTī likhūñgā

mujh jaise kuchh dīvāne hī zinda dil hote haiñ sāhab

maiñ itnā kamzor nahīñ jo pañkhā aur rassī likhūñgā

kab tak ghar meñ baiThe baiThe apne dil ke chhāle phoḌūñ

ab to in taptī saḌkoñ par āvāragardī likhūñgā

ham donoñ hī apnī apnī fitrat ke maare insāñ haiñ

tū mujh meñ ḳhāmī DhūñDegā maiñ terī ḳhūbī likhūñgā

kuchh aise tahrīr karūñgā ik misre meñ do afsāne

dariyā ko sāhil likhūñgā tūfāñ ko kashtī likhūñgā

Leave a Comment