Kaleja Munh Ko Aata Hai Shab-e-Furqat Jab Aati Hai

kaleja munh ko aata hai shab-e-furqat jab aati hai

akele munh lapete rote rote jaan jaati hai

lab-e-nazuk ke bose luun to missi munh banati hai

kaf-e-pa ko agar chumun to mehndi rang laati hai

dikhati hai kabhi bhala kabhi barchhi lagati hai

nigah-e-naz-e-janan ham ko kya kya azmati hai

vo bikhrane lage zulfon ko chehre par to main samjha

ghata men chand ya mahmil men laila munh chhupati hai

karegi apne hathon aaj apna khuun mashshata

bahut rach-rach ke talvon men tire mehndi lagati hai

na koi zor us ayyar par ab tak chala apna

yahan dam tutta hai aur dam men jaan jaati hai

tadapna tilmilana lotna sar pitna rona

shab-e-furqat akeli jaan par sau aafat aati hai

pachhaden kha raha huun lotta huun dard-e-furqat se

ajal ke paanv tuten kyuun nahin is vaqt aati hai