aag ik aur laga denge hamare aansu
nikle ankhon se agar dil ke sahare aansu
hasil-e-ḳhun-e-jigar dil ke hain paare aansu
be-baha la.al-o-guhar hain ye hamare aansu
hai koi ab jo lagi dil ki bujha.e meri
hijr men roke ganva baiTha huun saare aansu
us masiha ki jo furqat men huun roya shab-bhar
ban ga.e charḳh-e-chaharum ke sitare aansu
ḳhun-e-dil ḳhun-e-jigar bah gaya paani ho kar
kuchh na kaam aa.e mohabbat men hamare aansu
mujh ko sone na diya ashk-fishani ne miri
raat bhar ginte rahe charḳh ke taare aansu
vo sanvar kar kabhi aa.e jo tasavvur men mire
chashm-e-mushtaq ne sadqe men utare aansu
paas rusva.i ne chhoḌa na sukun ka daman
girte girte ruke ankhon ke kinare aansu
lutf ab aaya miri ashk-fishani ka huzur
pyari ankhon se kisi ke bahe pyare aansu
meri qismat men hai rona mujhe ro lene do
tum na is tarah bahao mire pyare aansu
mah-o-anjum pe na phir apne kabhi naaz kare
dekh le charḳh kisi din jo hamare aansu
yuun hi tufan jo uThate rahe kuchh din ‘naushad’
aag duniya men laga denge hamare aansu
Leave a Reply