Kala Jadu Phail Raha Hai

kaalā jaadū phail rahā hai

aur ḳhudā ḳhāmosh khaḌā hai

kaale saa.e naach rahe haiñ

chaar taraf pur-shor havā hai

aag dikhā kar jalne vaalo

kis kī aag meñ kaun jalā hai

saañs bhī tum lete ho kyūñ-kar

uff kitnī masmūm havā hai

lākhoñ bheḌeñ dauḌ rahī haiñ

ek gaDariyā haañk rahā hai

raqs-kunāñ huuñ ik rassī par

aur tavāzun bigaḌ rahā hai

maiñ raste ko DhūñD rahā huuñ

rasta mujh ko DhūñD rahā hai

kaun hai ye betāb jo kab se

raste meñ chup-chāp khaḌā hai

Leave a Comment