Ek-Tarfa Be-KHudi Mein Gum Hua Rahta Hun Main

Jameel Yusuf

ek-tarfa be-ḳhudi men gum hua rahta huun main

be-mahaba faslon ko napta rahta huun main

mere ḳhad-o-ḳhal ko pahchanna asan nahin

raste ki gard men akasr aTa rahta huun main

janta huun DhunDhta huun ik sarab-e-nur ko

phir bhi us ki khoj men paiham laga rahta huun main

karvan-e-shauq jis ko zindagi kahte ho tum

is tag-o-dau ke jilau men hi sada rahta huun main

hazrat-e-va.iz tujhe mera pata kyunkar mile

jism ke ka.abe men manind-e-ḳhuda rahta huun main