Nooh Narvi
dil hamari taraf se saaf karo
jo hua vo hua muaaf karo
ahl-e-gulshan bahar aa pahunchi
ḳhar-o-ḳhas se chaman ko saaf karo
jab sitam hoga phir karam ke ba.ad
to karam se mujhe muaaf karo
mujh se kahti hai us ki shan-e-karam
tum gunahon ka e’tiraf karo
ye bhi aadat men koi aadat hai
jo kaho us ke bar-ḳhilaf karo
kyuun bujhao paheliyan be-kar
guftugu mujh se saaf saaf karo
ek do tiin chaar panch nahin
sab ḳhata.en miri muaaf karo
husn un ko ye raa.e deta hai
kaam ummid ke ḳhilaf karo
hazrat-e-dil yahi hai dair-o-haram
mahfil-e-yar ka tavaf karo
tum saza do magar ba-hasb-e-qusur
main ye kahta nahin muaaf karo
is men bhi shaan paa.i jaati hai
ho koi baat inhiraf karo
saḳht-janon ka qatl khel nahin
kuchh dinon aur haath saaf karo
tum ko qahr-e-karam-numa ki qasam
faisla mere bar-ḳhilaf karo
khulte hain dil ke itne hi jauhar
jitna is aa.ine ko saaf karo
dil men hain ḳhar-e-arzu lakhon
aao kanTon se ghar ko saaf karo
tur-e-sina ki samt jaa.en kalim
‘nuh’ tum sair-e-koh-e-qaf karo
Leave a Reply