kal vo jo pa-e-shikar nikla
har dil ho umid-var nikla
jiine ki nahin umiid ham ko
tiir us ka jigar ke paar nikla
ham ḳhaak bhi ho gae par ab tak
dil se na tire ghubar nikla
jon baam pe be-naqab ho kar
vo mah-ruḳh ek baar nikla
us roz muqabil us ke ḳhurshid
nikla bhi to sharmsar nikla
gham-ḳhvar ho kaun ab hamara
jab tu hi na gham-gusar nikla
the jis ki talash men ham ab tak
paas apne hi vo nigar nikla
har-chand men ki sarishk baari
par dil se na ye buḳhar nikla
‘bedar’ hai ḳhair to ki shab ko
juun shama tu ashk-bar nikla
guzra hai ḳhayal kis ka ji men
aisa jo tu be-qarar nikla