kal raat sehn-e-dil men tha harja.iyon ka raqs
thi vahshaton ki thaap pachhal-pa.iyon ka raqs
manzum ho rahi thi ḳhamoshi ba-faiz-e-hijr
tha zehn men huruf ki parchha.iyon ka raqs
us ki ḳhushi mana.un ya afsos na karun
hai shohraton ke saaz pe rusva.iyon ka raqs
ye vo zamana hai nahin jis ki koi misal
yaan bha.iyon ke qatl pe hai bha.iyon ka raqs
shab bhar ada-e-husn ko Tuk dekhta raha
main us ḳhiram-e-naz ki angḌa.iyon ka raqs
andar tha mere vasl ka bistar laga hua
kamre men thak ke chuur tha tanha.iyon ka raqs
main mahv-e-guftugu tha tumhari nazar ke saath
aur mere ird-gard tha bina.iyon ka raqs
kuchh baat thi jo bazm men tanha khaḌa tha main
halanki char-su tha shanasa.iyon ka raqs
Leave a Reply