Rais Amrohvi
kal raat ka.i ḳhvab-e-pareshan nazar aa.e
jo shahr ki abad the viran nazar aa.e
bikhri hui rondi hui lashon se guzar kar
TuuTe hue minar-e-shahidan nazar aa.e
kohsar-e-himala ki jhalak ḳhvab men dekhi
ganga men ubalte hue tufan nazar aa.e
pahle to kisi qarya-e-barbad men Thahre
aage jo baḌhe gor-e-ghariban nazar aa.e
mahki hui ajdad ki ḳhushbu se hava.en
har-gam pe asar-e-azizan nazar aa.e
jis ghar men farishton ki ziya thi usi ghar men
arvah-e-ḳhabisa ke charaghan nazar aa.e
jo matla-e-taqdis-e-mohabbat the vo chehre
ḳhafagi ke sabab ham se gurezan nazar aa.e
ham jin ko dagha de ke kahin bhaag ga.e the
vo ahl-e-haram ba-sar-e-uryan nazar aa.e
ik pir-e-muqaddas ka hayula nazar aaya
phir rish-e-safed-o-dur-e-dandan nazar aa.e
ham jin ki pareshani-e-ḳhatir ka sabab the
vo alam-e-ruya men pareshan nazar aa.e
ik daman-e-ismat ki kiran duur se phuTi
daman pe ka.i gauhar-e-ghaltan nazar aa.e
thi jis ke tabassum men mala.ek ki halavat
sad-haif ki vo ḳhvab men giryan nazar aa.e
is shahr ko jo shaḳhs ke maulid ka sharaf ho
vo shaḳhs usi shahr men mehman nazar aa.e
lab par hai ‘ra.is’ apne ye misra.a ka.i din se
kal raat ka.i ḳhvab pareshan nazar aa.e
Leave a Reply