Azhar Adeeb
kal pardes men yaad aa.egi dhyan men rakh
apne shahr ki miTTi bhi saman men rakh
saare jism ko le kar ghuum zamane men
bas ik dil ki dhaḌkan pakistan men rakh
jaane kis raste se kirnen aa jaa.en
dil dahliz pe ankhen raushan-dan men rakh
jhiil men ik mahtab zaruri hota hai
koi tamanna is chashm-e-hairan men rakh
ham se shart lagane ki ik surat hai
apne saare ḳhvab yahan maidan men rakh
jab bhi chahun tera chehra soch sakun
bas itni si baat mire imkan men rakh
titli rasta bhuul ke aa bhi sakti hai
kaghaz ke ye phuul abhi gul-dan men rakh
apne dil se rusva.i ka ḳhauf nikal
‘az.har’ ab tasvir miri dalan men rakh
Leave a Reply