bhartendu-harishchandra

Asiran-E-Qafas Sehn-E-Chaman Ko Yaad Karte Hain

asiran-e-qafas sehn-e-chaman ko yaad karte hain

bhala bulbul pe yuun bhi zulm ai sayyad karte hain

kamar ka tere jis dam naqsh ham ijad karte hain

to jaan farman aa kar maani o bahzad karte hain

pas-e-murdan to rahne de zamin par ai saba mujh ko

ki mitti khaksaron ki nahin barbad karte hain

dam-e-raftar aati hai sada pazeb se teri

lahad ke khastagan uttho masiha yaad karte hain

qafas men ab to ai sayyad apna dil tadapta hai

bahar aai hai murghan-e-chaman fariyad karte hain

bata de ai nasim-e-subh shayad mar gaya majnun

ye kis ke phuul uthte hain jo gul fariyad karte hain

masal sach hai bashar ki qadar neamat baad hoti hai

suna hai aaj tak ham ko bahut vo yaad karte hain

lagaya baghban ne zakhm-e-kari dil pe bulbul ke

gareban-chak ghunche hain to gul fariyad karte hain

‘rasa’ aage na likh ab haal apni be-qarari ka

ba-rang-e-ghuncha-lab mazmun tire fariyad karte hain

More Poems

Leave a Comment