harim-e-dil se rah-e-chashm-e-tar se guzre hain
hazar baar vo is rahguzar se guzre hain
vo jin ko dekh ke lutf-e-hayat milta hai
kuchh aise dushman-e-jan bhi nazar se guzre hain
ye itr-bar faza.en ye pur-ziya jaade
bata rahe hain abhi vo idhar se guzre hain
jo zindagi ko ḳhud apne se bad-guman kar den
vo hadse bhi hamari nazar se guzre hain
jo teri yaad ki daulat se be-nasib rahe
vo lamhe ziist ke na-mo’tabar se guzre hain
jamal-e-dost bhi mushtaq-e-yak-nazar hai jahan
ham us bulandi-e-zauq-e-nazar se guzre hain
tumhen to hogi ḳhabar sakinan-e-dair-o-haram
suna hai hazrat-e-‘maikash’ idhar se guzre hain
Leave a Reply