Poet
kal ai ashob-e-nala aaj nahin
aaj hangama par mizaj nahin
ghair us ke ki ḳhuub roiye aur
gham-e-dil ka koi ilaaj nahin
ab bhi qimat hai dil ki gosha-e-chashm
itni ye jins be-rivaj nahin
shah ko bhi chahiye hai gor-o-kafan
kaun hai jis ko ehtiyaj nahin
dil se bas haath uTha tu ab ai ishq
deh-e-viran par ḳhiraj nahin
do-jahan bhi milen to bas hai hamen
yaan kuchh itni to ehtiyaj nahin
kar na jur.at tu ai tabib ki ye
dil ka dhaḌka hai iḳhtilaj nahin
main to ‘qa.em’ kahe tha tujh se aah
dil-e-nazuk hai ye zujaj nahin
Leave a Reply