kajal udaas hai to hain be-kal si chudiyan
tum ko bula rahi hain ye chanchal si chudiyan
savan ki mujh ko pyaas hai pyasi huun misl ret
tujh par baras rahi hain ye badal si chudiyan
karti hain khuub shor na sone ye mujh ko den
divani ho gai hain ye pagal si chudiyan
dekho khanak rahi hain ye khamoshiyon men bhi
ankhon men saj rahi hain ye jal-thal si chudiyan
pal pal ye chhu rahi hain mira jism aur badan
karti hain mujh ko tang ye sanval si chudiyan
ai shah-e-dil suhag nishani hamari hain
pyari hain mujh ko jaan se purple si chudiyan
khushbu mire badan ki churati hain roz-o-shab
dekho ‘dua’ kamal hain sandal si chudiyan
Leave a Reply