Kahun Main Kya Ki Kya dard-E-Nihan Hai

Poet

kahun main kya ki kya dard-e-nihan hai

tumhare puchhne hi se ayaan hai

shikayat ki bhi ab taqat kahan hai

nigah-e-hasrat ah-e-na-tavan hai

nishan-e-pa-e-gair us astan par

nahin hai mere marqad ka nishan hai

ajal ne ki hai kis dam mehrbani

ki jab pahlu men vo na-mehrban hai

tujhe bhi mil gaya hai koi tujh sa

ab aine se vo sohbat kahan hai

ye kis gul-ru ka aalam yaad aaya

dam-e-sard ik nasim-e-bostan hai

hui betabi-e-bulbul moassir

ki ghabraya hua kuchh baghban hai

sahar un ko irada hai safar ka

qayamat aane men shab darmiyan hai

koi yaan laao us isa-nafas ko

ki marta ‘shefta’ naam ik javan hai