raat ham ne jahan basar ki hai
ye kahani usi shajar ki hai
ye sitare yahan kahan se aa.e
ye to dahliz mere ghar ki hai
niind kya kijiye ki a.ankhon men
ik na.i jang ḳhair o shar ki hai
mere kachche makan ke andar
aaj taqrib chashm-e-tar ki hai
hijr ki shab guzar hi ja.egi
ye udasi to umr bhar ki hai
ishq apni jagah magar ham ne
muntaḳhab aur hi Dagar ki hai
uTh raha hai dhuan mire ghar men
aag divar se udhar ki hai
ham ne apne vajud ki chadar
tang apne guman par ki hai
vo sitara-shanas aisa tha
ya kisi ne use ḳhabar ki hai
ja rahe ho kidhar ‘rasa’ mirza
dekhte ho hava kidhar ki hai
Leave a Reply